THANTHAI PERIYAR

தந்தை பெரியார் 

கேரளாவில் வைக்கம் போராட்டம் ஈழவர்களுக்கும் புலையர்களுக்கும் அவர்களுடைய உரிமைகளை பெற்று தர தந்தை பெரியாரால்  நடத்தப்பட்டது. காலில் விலங்கு, கழுத்திலே தொங்கும் கைதி எண் எழுதிய மரப் பலகை, தலையில் தொப்பியுடன் கேரளா திருவனந்தபுரம் சிறையில் பெரியார்.  அந்த சமயம் ஜெயிலில் இருக்கும் அவருக்கு வாணவேடிக்கைகளும் வெடி சத்தமும் கேட்க விசாரித்த போது திருவாங்கூர் மகாராஜா இறந்துவிட்டார் என்று தெரிந்து கொண்டார்.  மகாராஜா இறந்ததை திருநாடு புகுந்துவிட்டார் என கூறுவதோடு அதை துக்கமாக இல்லாமல், மகிழ்வாக கொண்டாடும் பழக்கம் கேரளாவில் இருந்தது.  அதன் பின் ராணி ஆட்சியில் அமர்ந்தார்.  ராணி இந்த சாதி பிரச்சினை வளர்வதை விரும்பாததால் அப்போது இருந்த திவானிடம் கூற , திவான் ராகவையா என்பவர் ராஜாஜிக்கு கொஞ்சம் தெரிந்தவர் என்பதால், பெரியார் பிரச்சினையை சுமுகமாக பேசி பெரியாரை விடுதலை செய்யலாம் என ராஜாஜியை அணுகிய போது, ராஜாஜி காந்திஜியை அழைத்து திருவனந்தபுரம் சென்று ராணியிடமும் சிறையில் இருந்த பெரியாரிடமும் பேசி ஈழவர்களும், புலையர்களும் தெருக்களில் செல்லலாம் என்ற ராணியின் உத்தரவை பெற்று அதன்பின் பெரியார் சிறையிலிருந்து வெளியே வந்தார். 

காமராஜர் மீது காட்டிய பரிவு

11 நவம்பர் 1966 அன்று டெல்லியில் பசு வதையை எதிர்த்து ஆர்ப்பாட்டம் செய்த ஜனசங்கம், ஆர் எஸ் எஸ் இயக்கத்தினர் காமராஜரின் வீட்டை சூழ்ந்து நெருப்பு வைத்தனர்.  காமராஜர் மீது நடத்தப்பட்ட தாக்குதலை கடுமையாக கண்டித்தார் பெரியார். 

மானம், ரோசம், சூடு, சொரணை அற்ற இந்த நாட்டில் இந்த விஷயங்களை கூட சரிவர பிரசுரிப்பதற்கு தமிழனுக்கு பிறந்த தமிழினப் பத்திரிகைகள் ஓன்று கூட முன் வரவில்லையே என வருத்தத்தை வெளியிட்ட பெரியார் இறுதியில் கத்தி வைத்து கொள்ளுங்கள் .  காமராஜரை பாதுகாருங்கள்.  மறுபடியும் எழுத இடம் வைத்து கொள்ளாதீர்கள் என்று எச்சரித்திருந்தார் (விடுதலை 13.11.1966)

அகிம்சை வழியில் போராட்டம்

இந்தியா திருநாட்டில் பெரியாருக்கிணையான வேறு தலைவர்கள் யாரும் இல்லை எனலாம்.  இறுதிவரை அரசு பதவிக்கு ஆசை படாமல், தேர்தலில் போட்டியிடாமல் சமூக நீதிக்காக மட்டும்  தனது  வாழ்நாளை கழித்தவர்.  மகாத்மா அகிம்சையை வலியுறுத்தினர்  என்றால் இவர் சொல்லாமலே அகிம்சையை கடை பிடித்தார்.  ஒரு போராட்டம் கூட அகிம்சைக்கு எதிராக செய்ததில்லை.  கடவுள் மறுப்பு போராட்டம் என்றாலும் கடையில் வாங்கிய பிள்ளையாரை வீதியில் உடைப்பார்களே அல்லாமல், பாபர் மசூதியை இடித்தது போல் கோவிலுக்கு சென்று கடவுள் சிலைகளை உடைக்க போராட்டம் நடத்தியதில்லை.

நான் கண்ட பெரியார் 

 எனக்கு திருநெல்வேலி ஜங்ஷனில்இப்போது பேரின்ப விலாஸ் திரையரங்கு இருக்கும் இடத்தில் பெரியார் பேசிய கூட்டத்தை பார்க்கும் பாக்கியம் கிடைத்தது. மணியம்மை உடனிருந்தார். பெரிய  நாய் ஓன்று அவர் அமர்ந்திருந்த கட்டிலுக்கு அடியில். கட்டிலில் இருந்தபடியே பேசினார்.  எதற்கும் பயப்படாமல் பேசுகிறார்.  தியாகத்தின் திருஉருவம்.  தனது உடல் உபாதைகளை கூட பொருட்படுத்தாமல் நாடு முழுவதும் சுற்றி யாரும் செய்யாத சமுதாய பணிகளை செய்தார். 

தமிழ் எழுத்து சீர்திருத்தம்

தமிழ் எழுத்துக்களில் தனது  விடுதலை பத்திரிகையில் எழுதியதன் மூலம் சீர்திருத்தம் கொண்டு வந்தார்.  எம்ஜியார் அவர்கள் முதல்வராக இருக்கும் போது அரசாணை மூலம் அவற்றை கடை பிடிக்க வைத்தார்.

அவரது இறப்பின் பொது திரு குமரி அனந்தன் அவர்கள் ரேடியோவில் பேசியதை நான் கேட்டேன்.  பெரியார் ஒரு வண்ணன். சமுதாயத்தில் உள்ள அழுகுகளை நீங்கியதால் என பேசினார். 

கவிஞரின் கவிதை மழை

முத்தாய்ப்பாக பெரியார் நினைவாக கவிஞர் கண்ணதாசன் அவர்கள் என்றும் நிலைத்திருக்கும் அவரது புகழை பற்றி கீழ்கண்ட கவிதை மூலம்  கூறி விட்டார்.

“ ஊன்றி வரும் தடி சற்று நடுங்கக்கூடும்

உள்ளத்தின் உரத்திலே  நடுக்கமில்லை

தோன்றவரும் வடிவினிலே நடுக்கம் தோன்றும்

துவளாத கொள்கையிலே நடுக்கமில்லை

வான் தவழும் வெண் மேக தாடி ஆடும்

வளமான சிந்தனைக்கோர் ஆட்டமில்லை

ஆன்றவிந்த பெரியாருக்கு பெரியார்

எங்கள் ஐயாவிற்கு இணை மற்றோர் எவரும் இல்லை

நீதி மன்ற நீதிக்கும் நீதி சொல்வார்

நெறிகெட்டு வளைந்ததெல்லாம் நிமிர்த்தி வைப்பார்

சாதி என்னும் நாகத்தை தாக்கி தாக்கி

சாகடித்து பெருமை அவர் தடிக்கே உண்டு

நாதியில்லார் நாதி பெற நாற்படைத்தார் 

நாற்பத்தி ஐங்கோடி மக்களுக்கும்

பேதமில்லா வாழ்வு தர பிறந்து வந்தார்

பிறப்பினிலே பெரியாராய் தான் பிறந்தார்

ஆக்காத நூல் இல்லை : ஆய்ந்து

தேர்ந்து அழிக்காத  கருத்தில்லை

அழுத்தமாக தாக்காத பழமையையில்லை

தந்தை நெஞ்சில் தழைக்காத உவமையில்லை

தமிழ் நிலத்தில் நீக்காத களையில்லை

நினைத்து சொல்லி நிலைக்காத பொருளில்லை

நீதிகூட காக்காத உலகத்தை பெரியார் காத்தார்

கருணை மழை மேகத்தை காலம் காக்கும் “

ARIGNAR ANNADURAI

அண்ணா

காஞ்சிபுரத்தில் ஏழை நெசவாளர் குடும்பத்தில் பிறந்தவர் அண்ணா என்று  வாஞ்சையோடு தமிழக மக்களால் இன்றும் என்றும் அழைக்கப்படும் அறிஞர் அண்ணாதுரை அவர்களின் பிறந்த நாள் 15.09.1909. முதுகலை பொருளியல், அரசியல் படித்து ஆங்கிலம், தமிழ் இரண்டிலும் பேச்சு வன்மை எழுத்து வன்மை. இலக்கியத்தில் புலமை.   இங்கிலாந்து மாணவர்கள் கிண்டலாக இவரது ஆங்கில புலமையை சோதிக்க, Because என்ற வார்த்தையை தொடர்ந்து மூன்று முறை உபயோகப்படுத்தி வாக்கியம் அமைத்து அவர்களை வாயடைக்க வைத்தது.  பத்திரிக்கை, நாடகம், சினிமா, மேடைபேச்சு, அரசியல் என அனைத்து துறை வித்தகர்.  

எதிர்க்கட்சி தலைவர்

பெரியாரும் கலைஞரும் பெரிய அளவில் பாராட்டுகளையும், எதிர்ப்பு விமர்சனங்களையும் தாங்கியது போல அண்ணா பெரிய அளவில் விமர்சனத்தை எதிர்கொள்ளவில்லை. காரணம் அண்ணாவை எதிர்ப்பவர்கள் கூட அவரை விமர்சனம் செய்ய தயங்குவார்கள்.  தன்னுடன் நெடுஞ்செழியன், மதியழகன்,சம்பத் என்.வி. நடராஜன், அன்பழகன், கலைஞர், எம்.ஜி.ஆர் போன்ற திமையானவர்களை இரண்டாம் கட்ட தலைவர்களை தன்  தம்பிகளாக தன்னுடன் வைத்து கொண்டிருந்தது அண்ணாவுடைய தன்னம்பிக்கைக்கு சான்று. 1957 ல் எதிர் கட்சி தலைவராக இருந்த பொது காங்கிரஸ் உறுப்பினர்கள் நல்ல எதிர் கட்சியாக இயங்க திமுகவிற்கு தெரியவில்லை என சட்டசபையில் கேட்டபோது சாதுரியமாக "நீங்கள் எதிர் கட்சியாக இயங்க தெரியவில்லை என சொல்லிக்கொண்டிருப்பதை பார்த்தால் விரைவில் நீங்களே அந்த குறையை போக்க வருவீர்கள் என எண்ணுகிறேன் என்று ஒரே போடாக போட்டவர்,  மேலும் நாங்கள் ஒரு காலத்தில் நீங்கள் இப்போது இருக்கும் இடத்தில அமர வேண்டியவர்கள் என்பதால் பொறுப்புணர்ந்து அடக்கத்துடன் கூறிக்கொள்கிறேன்.    சொன்னது  போல் நடந்தது. 1967 க்கு பின் ஐம்பது ஆண்டுகளுக்கு பின்னும் காங்கிரஸ் எதிர்கட்சியாக கூட வரமுடியாத நிலை இன்னும் தொடர்கிறது. தீர்க்கதரிசி.  

தமிழக முதல்வர்

1967 பொது தேர்தலில் மாபெரும் வெற்றி.  பெருந்தலைவர் காமராஜரே தோல்வி.  முதலமைச்சர் ஆனதும் தமிழ்நாடு பெயர் மாற்றம், சுயமரியாதை திருமணத்திற்கு சட்ட அங்கீகாரம், ரூபாய்க்கு ஒரு படி அரிசி, இரண்டாம் உலக தமிழ் மாநாடு, சாதனை தொடர முடியாமல் புற்று நோய்.  03.02.1969 ல் மரணம். 

 இறுதி  ஊர்வலம்

அண்ணாவின் இறுதி ஊர்வலத்தில் பதினைந்து மில்லியன் மக்கள் கலந்து கொண்டது உலக கின்னஸ் சாதனை.  இன்றுவரை எந்த தலைவருக்கும் கிடைக்காத பெருமை.  மக்கள் அவர் மீது வைத்த அன்பிற்கும் நம்பிக்கைக்கும்  அதுவே சாட்சி.   

அண்ணாவின் எளிமை

எளிமையானவர், சொத்து சேர்க்காதவர், நேர்மையானவர், குழந்தைகள் இல்லாததால் நான்கு குழந்தைகளை தத்தெடுத்து வளர்த்தாலும் குழந்தைகள் யாரையும் அரசியல் பக்கமே அனுமதிக்கவில்லை. இறந்த போது அவர் பெயரில் இந்தியன் வங்கியில் இருந்தது வெறும் ஐயாயிரம் மட்டுமே. உலக வரலாற்றில் இறக்கும் தருவாயிலும் புத்தகம் படித்து கொண்டிருந்தவர்கள் பகத்சிங்கும் அண்ணாவும்தான். அண்ணா கடைசியாக அறுவை சிகிச்சைக்கு முன்னர் படித்த புத்தகம் The Master Christian என்ற புத்தகம். எழுதியவர் Marie Corelli என்பவர். அண்ணா இறுதியாக படித்த காரணத்தால் அன்றைய தினம் குமுதம் பத்திரிக்கை யில் "புரட்சி துறவி" என்ற பெயரில் ரா.கி.ரங்கராஜன் தமிழில் மொழி பெயர்த்து வெளியானது. 

             1962 தேர்தலில் சட்டமன்ற தேர்தலில் தோற்ற பிறகு பாராளுமன்ற மேலவை உறுப்பினரான பின் வாஜ்பாயுடன் நன்கு நட்புறவு கொண்டார். டெல்லியில் வாஜ்பாய் பேசிய கூட்டத்தை கடைசி வரிசையில் தரையில் உட்கார்ந்து கேட்டு விட்டு மறுநாள் வாஜ்பாயுடன் தங்கள் கூட்டத்தை நேற்று கேட்டேன். மிகச்சிறந்த பேச்சு என அண்ணா கூறிய போது வாஜ்பாய் ஏன் கடைசி வரிசையில் தரையில் உட்கார்ந்து கேட்டீர்கள். மேடையில் வந்து அமர்ந்திருக்க வேண்டியதுதானே எனக் கேட்டார். திரராவிட நாகரிகத்தை அண்ணாவிடம் தான் கற்று கொண்டதாக வாஜ்பாயி ஒரு சமயம் தெரிவித்தார்

நான் திருநெல்வேலியில் 1968 ல் இப்போது ஜங்ஷன் பஸ் நிலையம் அருகில் அண்ணா அவர்கள் கலந்து கொண்ட அரசு விழாவில் அவர் பேசியதை  கேட்டேன் . அப்போது எட்டாம் வகுப்பு படித்து கொண்டிருந்தேன்.  ஊசி விழுந்தால் சத்தம் கேட்கும் அமைதி.  பேச ஆரம்பித்தவுடன் கேட்பவர்களின் மேனி சிலிர்க்கிறது. பேசும் போது வேட்டியை காட்டும் லாவகம், அவர் பேசக்கூடிய  பொருள் கேட்பவர் மனதில் அப்படியே பதியும்.  Pied piper பின்னால்  எலிகள் போனது போல் கேட்பவர்கள் எல்லாம் அவர் பின்னால்.  உயரம் குறைவு, கவரும் அழகு கிடையாது, ஆனாலும்   அவருகிணையான  ஆளுமை யாருக்கும் இல்லை. அவர் பெயர் சொல்லாமல் யாரும் தமிழ்நாட்டில் எப்போதும் அரசியல் செய்ய முடியாது.

தமிழ்நாடு முழுக்க மொட்டை

அண்ணா இறுதி ஊர்வலத்தில் கலந்து கொண்டவர்கள் 15 மில்லியன் என்றால் அவர் இறந்ததற்காக மொட்டை போட்டவர்கள் தமிழகம் முழுதும் குறைந்தது அரை மில்லியன் பேர் இருக்கலாம். அதுவும் ஒரு கின்னஸ் தான்.  ஆனால் பதிவு செய்யப்பட வில்லை.  சில ஆண்டுளுக்கு முன் தமிழகத்தில் செல்வி ஜெயலலிதா முதல்வர்,  வழக்கிலிருந்து விடுதலை பெற ஆயிரக்கணக்கில் மக்கள் மொட்டை அடித்து கொண்டார்கள். பத்திரிக்கைகளில் எல்லாம் மொட்டைக்கு ரூபாய் 500 வீதம் கொடுத்து அடிக்கிறார்கள் என விமரிசனம் இருந்தது.  அதே தலைவர் இறந்த போது  மொட்டை அடிப்பதில் யாரும் ஆர்வம் காட்ட வில்லை.  உண்மை விசுவாசிகள் மட்டும் மொட்டை அடித்து கொண்டார்கள்.  ஆனால் அண்ணா மறைவுக்கு மொட்டை அடித்தவர்கள் சொந்த செலவில் உணர்ச்சி  மேலிட அடித்தவர்கள். எனக்கு சிறிய தாத்தா மகன், என்னுடைய சித்தப்பா அப்போது திராவிட முன்னேற்ற கழகத்தை சேர்ந்தவர். தன்னுடைய தந்தை இறக்கும் பொது எங்கள் வழக்கப்படி மொட்டை போட மறுத்து விட்டார்.  பகுத்தறிவு காரணம் காட்டி.   ஆனால் அண்ணா இறந்த போது மொட்டை போட்டு கொண்டார் என்பது எனக்கு நினைவு இருக்கிறது.  என்னுடைய பள்ளியில் என்னுடைய ஆசிரியர்கள், பள்ளியில் கீழ்நிலை ஊழியர்கள் பலர் மொட்டையோடு வந்தார்கள் என்பது கூடுதல் செய்தி. தமிழ்நாடு முழுவதும் இந்த நிலை இருந்தது யாரும் மறக்க முடியாது. அண்ணாவை பற்றி எழுத எழுத செய்திகள் வந்து கொண்டே இருக்கிறது. அவர் நாடகத்தில், திரை படத்தில் அரசியலில், அரசு பதவியில் செய்த எண்ணிக்கையில் அடங்காத சாதனைகள் அவரை இன்னும் நூறாண்டுகளுக்கு நினைக்க வைக்கும்.